جدتي مراهقة

[فتىالقرينة]

في احد ليالي رمضان الواجدة...نشبت لي جدتي تبيني اوديها الفيصلية...قلت يامرة ذي ماتصلح...تقول الا وش معنى ام صالح تروح وانا لا؟!..مدري وش جاها ذي انهبلت...قلت طيب ابوديك بس على شرط...قالت وشو...انك ماتسوين حركات اغراء ومالها داعي:p...مدري وش صار بعدها منيب في وعيي:)..بغيت اوديها الشيخ يقرى عليها..شكل داخلها جني مراهق:D
ووعدتها اوديها بكرة...ولان محاكيكم ماقد طب الفيصلية...مابقى احد ماعلمه انه بيروح..بس اهم شي جدي ماياصل له شي لايدبغني انا والعجوز المراهقة:D...رجعت الظهر من الدوام...ابي احط راسي من بعد هالكرفة....ولا اول مادخلت وهي بخشتي...صاقعة براطمها بمعجون طماط يقالها روج:D...وكاسرة جحة على راسها على شان تحمر خدودها..!
والله ميب هينة هالعجيز تعرف حركات الموضة:p...وانا اللي امسكها والعن ابو الطيب(المتنبي:p)فيها...قلت البيوت لها حرمة يامرة...تبين تطرين طسي بالشارع ولا تدخلين بيوتنا يامال الوجع...عمى بعين العدو:p<----يحسبها طرارة:D...بس طلعت جدتي عن 10 رجال...الظاهر الحين عرفت وراها توزوز تالي الليول يوم الثلاثاء...اثرها تناظر مصارعة..سوت بي سوبلكسات خلفية...وحركات اندر تايكر:D
من زود التصفيق اللي جاني...صقعتها بمية ريال...قالت وجع...انا جدتك يالردي..جعلك الجدري اللي يخسف بك..هاه..السموحة والله ماعرفتس...وانا اللي احب راسها خوفا من هجمات اخرى..من قوة البوسة شفطت العباة...وانا اللي افهمها ان اللي تسويه غلط وذي حركات مراهقات مايستح على خششهن..وانتي حرمة كبيرة وعاقلة وفاهمة...<---اللي يسمع هالمقدمة يقول ميت لها احد وبيقولها:D
قالت المهم بس..يالله مشينا....هاه@@...وينهوله يمة؟..وينهوله بعد...للدبوس العملاق(الفيصلية):D....الله يصلحتس الحين محد يفتح وبعدين تونا راجع وابي ارقد تعبان...وبعدين ماينراح له وحنا صايمين تبي تفسدين صيامنا انتي:p...هي:وراه ياكافي قايلت لك ودني الشيراتون انا<---ياهي تسمع به:D...قلت اذا صلينا التراويح وعينا من الله خير نروح...وبعدين ساعة من الاخذ والعطا...يالله اقتنعت..
صليت العصر ومامداني احط راسي الا جا الفطور..جيت اباخذ لي تمرة..ولا جدتي تعطيني وحدة مدري وش الطاري...مارديتها وخذتها..وانا اكلها احس بقراطيس..ولا وسطها ورقة..طلعتها من فمي..ولا ورقة مكتوب عليها لاتنسى الوعد:D...احوول والله النشبة...واهز راسي عشان تفهم اني منيب ناسي خاصتن عقب الطق اللي جاني...واذن العشاء..رحت اصلي بالملك خالد..عشانه يطول..لاتنشب لنا هالدبا:p...يوم عودت وانا
فاصخن نعالي مابيها تسمع خطواتي..مادريت الا ذيك اللي حطمت الرقم القياسي بالوثب الطويل وربضت قبالي...هيه يالله مشينا ولا تعذر خلاص...قلت يالله الله يكون بالعون:(....ركبنا السيارة..ولا تقولي ماعندك خالد الجديد؟!...انا فتحت فتحة ثانية في سقف الموتر من الخرشة...وش جاها ذي..ويالله وصلنا الفيصليلة من الزحمة وبربرت هالعجيز..نزلنا ووقفني السكيورتي...قلت هذي محرمي:p...قال اجل امش..
دخلنا ولا الظاهر مابعد وصلهم رمضان ذولي..عالم صاكة خششها بوية..ونظارات ملونة...وكعب وعطور ومن هالهرج...وبنات بعد!!...سويت يوغا وقعدت اتأمل هالمنظر المرعب:D...هالحين ذا مجتمعنا السعودي !...لحوول ولا قوة الا بالله:(..ماوعيت الا على صقعة العجيز..امش خلنا نتمشى..لحوول حتى انتي بعد:(..يالله مشينا...ولا العالم منهبلة..وش هالهبلة..هذا كبرها وجايتن عندنا...اللي بلغ على تمساح منحاش من حديقة الحيوان...واللي علم الهيئة يقولون جدتي ترقم:D
وانا ابي اقول لجدتي مشينا بس...واشوة قالتها هي..قالت وش ذا الخرط..مشينا وانا جدتك بس..قلت بس..ركدت المرة وعودت لعقلها:)..يوم ركبنا السيارة قالت يالله المملكة ياوليدي..انا:عيوني صارت دوار العويضة من الصقعة اللي جتني...بس مهنا دبرة منها رايحين رايحين لو وشو..سألتها هي تقصد جوال المملكة ولا وشو...بغت تطيرني وتجي تسوق عني...رحت للمكلة وامري لله وياني كعيت مليون مرة فرامل من هاللي يمشون عند البوابة شلون اذا دخلنا:)
ويالله لقينا موقف...وحولت جدتي المصون..ومن زود الزحمة على هالبوابة ضيعت جدتي...بس لقيتها على طوول المهم دخلنا والقى الحال من بعضه...اللي هنا هناك...قلت ياجدتي ماودتس تعقلين ونروح العويس بس:D...قالت الفقه وامش بس..رحت وراها نمتر المملكة..الله من البلاوي..تقل فيه مهرجان تفصيخ ولا اغراء..ولا فيه بنية مسلمة تخاف ربها تلبس كذا!..وخشة جدتي كل مالها وتطيح شكلها متأثرة بفصل الخريف:p..وبعد عدد لايحصى من الفرات والصولات والجولات والحلبات المصارعات:p
قال جدتي امش بس..قلت وينهو له؟...قالت نعود معد ورى خلاص...ولا اشوة شكلها عودت لعقلها لان بصراحة كنت شاك في عقلها الظاهر انها شاربة باور هورس تحسبها بيرة بكحول:D...طلعنا واشوف ذاك الصارووخ...قلت لجدتي روحي السيارة وابجيك بس ابشتري غرض..قالت طيب..وادز ورى هالزينة من جحر لجحر...الين دخلت محل مافيه الا انا وياها..بس خرب علينا راعي المحل الخلوة:p...واكتب الرقم على ورقة واعفطها واسفها عليها<---يحسب انه يرجم على مدرس ذا:D
واركض لجدتي..ومالقيتها عند السيارة قلت اكيد انها ضيعت..واحوس بالمواقف..والقاها واقفة تروح وتجي مدري وش عندها شكلها تلمح تبين اوديها تعتمر:D...ولا شايب واقف يتميلح هو وياها انا ضيعت كني افغانستان يوم يطقونها...قلت هيه هيه وينا فيه وامسكه مسكة مخلبية واقول خير يابوي وش عندك...قال الحب ياوليدي...انا:!..وجع ماتستحي انت..وارنه بكف والاه منصفط على الشارع مايتحمل ذا الضعيف..واقعد اعطي جدتي نظرات من حقات القصبي اذا عصب:D
قالت اخر مرة يايبة والله ماعاودها...هاه!..بس لقيتها فرصة ارد التصفيق اللي جاني وماقصرت فيها:D...وانا جالس اعطيها نصايح بالسيارة ويدق الجوال دقة ويقفل..سحبت عليها وشوي الا ونفس الحركة..قالت اجل تعطيني نصايح<---مدري وش عرفها بهالحركات هالملعونة:D...واناظر الا رقم غريب...قلت بس مافيه الا هي..واكمل هرجي مع جدتي لين وصلنا للبيت..واخذ الجوال وادق ويطلع مقفل:(..واقعد طول الليل ادق عليها مقفل..ماانفتح الا حول الـ3 الفجر..
قلت بس مابي سحور ابتسحر عليها:D...ويرد علي واحد الظاهر فيه غراب معشش في حنجرته...مدري وشلون الاسلاك حقت التلفون تحمل توصل صوته..قلت مساء النور..قال وش تبي؟..قلت انت اللي داق قبل..قال اها بس قلت اها بس ولا بكره ابوشنب:D..اخلص بس من معي...قال الظاهر انك غلطان تاكد...واقفل وادق ثانية ويرد..قلت هاه من معي اخلص بس؟...ويرد علي صوت بس هالمرة معشش كروان في حنجرته:p...قال نعم؟...انا انلخمت قلت هلا اهلا مساء النور خير وش تبي:D...قال خير؟..
قلت كيفنا وش اخبارنا:D...قالت انت ذاك؟...قلت ايه انا بشحمه ولحمه..قال اسمع ابيك تجي بسرعة...قلت وين تو العلاقة ماقوت اصبري خلنا نتعرف اكثر..قالت وش تعارفه انجز بس تعال..طيب وين البيت...قالت احوول كم مرة اوصف لك انت..!..قلت وش اللي كم مرة ماقد وصفتي لي شي..وعطتني الوصف ورحت...وفتح لي اللي رد علي خيونا الغراب ذاك..قال سم؟..قلت هاه وشو..!قال:سم من بغيت؟..قلت اخوك موظف على قد حاله ويكد على عايلة من 20 واحد شف لنا احد يكز لنا كم قرش..قال الله يعطيك..
انا ماصدقت انحاش منه..اخبر الطرار ينشب انا ماصدقت وذلف..وادق عليها قلت هيه وين وشلون ادخل..قالت امش اخلي الشغالة تفتح لك الظاهر اخوي نايم..وفتحت لي الشغالة ودخلتني لحمام مجلسهم..وينفتح باب المجلس ووحدة متغطية تدخل..قالت هو سعودي ياويلي وش ذا اطلع ومن هالكلام!..قلت اجل تبين هندي يرقمك؟...وانحاشت وجا اخوها الغراب..وقال وجع انت وش جابك ماقلنا الله يعطيك وعطاني من الجامد الله لايوريك وش جدتي عنده ذا..ومزعني برا البيت..وادق عليها وردت وتعطيني تهزيء..قلت يابنت
الحلال والله مدري وش القصة..وش السالفة الحين؟..قالت انا مكلمه سباك يصلح لنا الحمام واحسبه انت خلاص مابينا شي..طووط طووط..:(،نعنبوهم الحين هندي يدخلن عليه عادي وحنا ياعيال الديرة لا..!

الزبدة تخلي كوليتولك عالي:D..قصدي الزبدة من الموضوع:
1-محاكاة للي بيصير عقب 6 شهور بالتكاسي..الظاهر بيبنون جدار بين السواق الراكب:p
2-وش هالدجة اللي بالاسواق..ورا بناتنا صاروا كذا..يعني عمرك شفت بنت ترقم ولد!
3-تم شرحه في صفحة 25:p:D


وشكر لحسن اصغائكم والسلامو عليكم:)

ملاحظة:الموضوع مكتوب في رمضان الماضي<---قل قسم:am:

[niga_sa22]

السلام عليكم

يا أخي مدري وش أرد بس موضوعك أكيد بيتبع أخوياه للميزة يا مميز

....ولا اول مادخلت وهي بخشتي...صاقعة براطمها بمعجون طماط يقالها روج:D...وكاسرة جحة على راسها على شان تحمر خدودها..!

^
^
^
^
^
^
^
كل هذا و تقول مراهقه الله يصلحك هاذي مراهقتووون :lol:

الظاهر إنك طالع لجدتك و مكثر شطة اليوم موضوعك كالعادة مميز يا بطل

[عشق ليل]

ههههههههههههههههههههههههههه

صراحة نفتقد كثيراً هذا النوع من الفكاهة الساخرة

والتي تتكلم عن مشاكل موجوده بمجتمعنا بقالب كوميدي

تسلم أخوي على هذا السرد والخيال الواسع


متميز كعادتم


يثبت الموضوع

[طويلــة العمــر]

تموووون على جدتك

تتكافخ إنت وياها http://smilies.sofrayt.com/%5E/c0/lol.gif

http://smilies.sofrayt.com/%5E/_950/boxing.gif

..

موضوعك كذا http://smilies.sofrayt.com/%5E/9/biggthum.gif

واصل معنا و الله يعطيك العافية ..

[القهوجي]

هههههههههههههههه

موضوع مميز

والله رهيب مشكور اخوي

[النـايــف]

فتى الله يصلح جدتك خخخخخخخخ



والله موضوع مميز جداً


يسلمووووووووو فتى



تحياتي لك


أخوك ذعار

[MiSs_beauty]

:he:

رهيبة والله .....

[ALHAYEM]

ههههههههههههههههههاي

سلملي على جدتك و قلها اجر و عافيه <<< فاهم الموضوع غلط

بس حللللللوة دقاتك في الصميم :)

سلمت يمبنك على هيك موضوع

[سلام دانك]

هههههههوهوهوهوووهههههووهوهوووووووووو
حلوه ذي

[الساهيه]

ههههههههههههههههههاي

جدتك هذي جده خمس نجوم ممكن تسلفني اياها بكشخ

فيها قدام خوياتي

موضوعك شي والله

[جمال الناصر]

هههههههههههههه فتى القرينه


والله ان جدتك مراهقة من جد :lol::lol:


الله يرجك وياها :r:




اجل ((..وانا اكلها احس بقراطيس ))



هههههههههههههه



تخيلت هالموقف



بس وس رايك بالطعم :S:

[درين ابوالحصين]

:))مشكور اخوي علي هذه المشاركه بصراحه انك ابدعت


زينطك الف عافيه



:ad::ad::ad::ad:

[فلان بن علان]

الله ياجدتك مراهقه بقوه:he:

[bawad]

طبعاًً تحب جدتكlo-:




وتكافخ معاهاhit::





لزم انك تتفاهم معاهاta-:





وشكرا على موضوعك الجميل